MIRROR演唱會上星期四第4場演出發生屏幕墮下事故，令舞者阿Mo（李啟言）、張梓峯（阿峯）及羅德智(Zizac）受傷，其中阿Mo傷重危殆。

事發近一星期，不少鏡粉都擔心MIRROR成員情況，多日來只有隊長Lokman（楊樂文）喺社交平台發文報平安，表示「我哋會互相照顧，大家唔駛擔心我哋」。

另一成員姜濤凌晨時份終於打破沉默，喺社交媒體表態，表示「不會放棄 我們不會放棄 一定會站起來 一起面對一切」。姜B嘅回應似係要打破近來甚囂塵上嘅MIRROR解散傳聞。

另外，MIRROR及同公司女團COLLAR，以及演唱會主辦單位Makerville負責人魯庭暉、MIRROR經理人花姐（黃慧君）星期三返晒九龍灣公司辦公室開會，估計係商討短期內工作安排。