內地藝人Angelababy（楊穎）疑受「19禁」歌舞騷風波影響，依家處於「被Out」狀態，多個相關節目、廣告代言等都偷偷除名或下架，長駐綜藝亦未有再見佢現身錄影，但一直未有被官方宣布封殺，反而傳聞更加似層層。不過今日（25日）有品牌商忽然晒出Baby嘅最新宣傳片，見佢狀態十足咁Sell保暖外套，成為佢風波後首次現身片段。

網上同時有傳，Baby疑因遭封殺，私下曾聯繫前夫、內地影帝黃曉明幫忙，黃曉明曾為佢出動關係，試圖幫前妻度過難關，但連黃曉明都束手無策；又有爆料指Baby將出售佢價值5億人民幣（下同，約5.35億港元）嘅北京豪宅，處境一夕間跌落谷底。據悉，該豪宅位於三里屯一號，係當地最頂級路段，每一坪索價35萬人民幣（約37.92萬港元），Baby買下嘅更係該區最豪華嗰棟豪宅，為佔地1,300坪嘅複式別墅。