踏入9月，唱片公司開始發力為歌手力推新歌，務求谷起個勢年尾爭獎。計算播放率嘅商台叱咤樂壇流行榜903專業推介已經公布35周成績，對於各獎項形勢理應稍有眉目。

不過近兩三年，男歌手同組合獎因為MIRROR爆紅加入戰團而競爭激烈，相對而言女歌手聲勢被比下去。今年至今35首冠軍歌當中，只有7首由女歌手作品包辦，意味住女歌手們播放率上更勢均力敵。另一變數係過去2年奪得女歌手金獎嘅鄭欣宜，因身體問題而無限期休養，令爭獎形勢更見混亂！

7位今年擁有叱咤冠軍歌嘅女歌手分別雲浩影、Gin Lee、Marf（邱彥筒）＠COLLAR、鄭秀文、Kiri T、陳蕾及AGA。當中Gin Lee、陳蕾及AGA稍為佔優，至今已有3首歌入榜。陳蕾向來受商台DJ支持，今年亦安排佢同2位MIRROR成員陳卓賢(Ian）及江𤒹生(AK)合作舉行拉闊音樂會，歌曲播放率應該唔錯，冠軍歌《伸縮自如的愛》之外，另一派台歌《窮人的薔薇》亦獲得亞軍。

至於AGA，雖然所屬公司環球唱片近年同商台關係欠佳，環球更曾經發聲明指「近兩年來商台不太喜歡環球唱片旗下歌手的作品」。不過商台對AGA相當支持，2020年曾頒發女歌手金獎畀AGA，即使兩間公司關係麻麻期間，都播到AGA嘅歌登上冠軍。而環球唱片大中華區董事總經理黃劍濤今年6月離任後，環球同商台關係似乎有機會改善。而剛舉行完首次個唱嘅AGA，今年3首派台歌都打入十大。

但係論現時歌曲成績，最有機會奪金嘅會係今年轉會英皇嘅Gin Lee。Gin Lee嘅新東家向來積極為旗下歌手（尤其係轉會歌手）爭取好成績，派歌亦有準確部署。首支主打Dum Dum係五台冠軍歌，其餘2首派台歌《單戀這件小事》及《企好》都打入三甲，而《企好》亦甚有冠軍相。相信英皇會為Gin Lee再派多一首年度壓軸，務求為衝金造勢。