歌手關心妍（Jade）將於6月4及5日在紅館舉行入行20周年紀念演唱會，對上一次在紅館開騷已是10年前，她說：「我呢個年紀去紅館開騷真係好難，今次都係本住唔知仲有冇下一次嘅心態。」今年初雖然攞到檔期，但因疫情不知能否成事，直至4月終於落實，過程驚心動魄：「到正式宣布時得番個半月，係第一次咁短時間一撻就上紅館，真係好驚險。」

Jade的紅館騷遭張敬軒、鄭欣宜、MIRROR前後夾攻，不過她對此未有擔心：「我個觀眾層都係我嘅年代，20周年慶祝番我哋嘅青春、回憶，票房壓力一定有，始終疫情下經濟咁樣，所以真係唔容易，盡力呼籲大家嚟睇，當係最後一次㗎喇，除非我50歲你都仲想睇我。」談到初出道時並非走青春路線，她解釋那時較流行成熟打扮，因很早便「老定了」，到了現在看起來反而並沒太大分別。

夫女愛犬爭住錫

上次開騷時，女兒楊榮心未出世，今次會否安排囡囡上台？Jade說：「唔知佢夠唔夠膽。」由細到大心心黐她多過老公楊長智，她自爆在家中經常周旋於老公、女兒及愛犬當中，她笑說：「個囡真係好呷醋，老公錫我都唔得，連我隻狗佢都呷醋，所以朝早我好忙，個個趕住嚟錫我，見到佢哋都好笑，但開心嘅，自己喺佢哋心目中咁重要都值得嘅。」