內地人氣綜藝節目「浪姐」第三季《乘風破浪》未播出已掀起全城熱話，今日（17日）節目官方社交網正式官宣參賽「姐姐」名單，雖然名單與早前路透消息並冇太大出入，香港代表嘅組合Twins、薛凱琪、胡杏兒，以及台灣「甜心教主」王心凌、前南韓組合少女時代嘅成員Jessica（鄭秀妍）、再度回歸嘅天后那英等全部榜上有名，不過今次官宣消息仍有驚喜，因為節目組一口氣晒出兩款造型海報，一班「姐姐」率先「開戰」鬥性感。
其中一輯以紅色作為背景嘅造型照中，鍾欣潼（阿嬌）同「死敵」Jessica最性感，當中阿嬌「中門大開」Deep V直落肚臍，而Jessica則大騷腹肌應戰，不過見阿嬌狀態大勇，激瘦見腮骨，先贏一局比Jessica更搶眼。至於近年屢被指「變樣」嘅薛凱琪，今次繼續「走樣」，網民直呼唔認得。
