![](https://www.jordanreleasenews.com/wp-content/uploads/2024/02/王祖藍李亞男返港過年-過億豪宅擁無敵靚海景-天台大到有兒童玩樂區-477x318.jpg)
圈中模範夫妻王祖藍與李亞男於2015年結婚,婚後育有兩位可愛囡囡,一家四口幸福快樂。而事業方面,王祖藍北上發展多年,獲不少綜藝節目邀請,人氣頗高之外,人仔亦賺到笑。投資物業有道嘅祖藍,喺大埔白石角先後購入多個豪宅單位。近日王祖藍一家四口返港過年,李亞男上載一段一家人食團年飯嘅影片到小紅書與網民分享,結果意外令過億豪宅內景曝光。
李亞男喺小紅書上載影片並留言:「最幸福的是一家人坐在一起吃團圓飯!過年啦!大家的春節團圓飯都吃了啥呢~我們家晚上要開party,為了滿足所有人的口味,這次的團圓飯東南西北各種口味都安排上了~新的一年要繼續多陪伴家人,珍惜和家人團圓的時光!#很男不有趣的日常 #浪漫生活的記錄者 #大家的春節 #我家年味不一般 #明星不止AB面」。
喺影片中,李亞男首先為大家介紹豪宅中嘅新年佈置,屋內裝修以米白色為主,坐擁吐露港無敵大海景,闊落嘅客廳擺放咗一棵高過人嘅大桃花,而玄關位置亦放有大吉及蘭花。而廚房就係開放式設計,空間感十足嘅同時,設備亦非常齊全。喺呢個時候,李亞男表示當晚開派對,準備咗各式各樣嘅打邊爐食材及其他豐富食物,而王祖藍因為老婆鍾意食嘅關係,專誠喺成都同東北帶咗火鍋底料同麻辣燙返香港。之後,佢哋就移師到天台,景觀相當開揚且有山有海,除咗有地方俾眾人食嘢之外,仲有部位位置係舖上草皮做兒童玩樂區及有鞦韆俾囡囡耍樂。