《中年好聲音》已於啱啱過去嘅周日（23日）圓滿結束，周吉佩被指爆冷擊敗賽前大熱龍婷及李佳奪冠，李佳奪亞軍，季軍則是羅啟豪，而龍婷僅獲「觀眾最愛好聲音」獎項，賽果令唔少觀眾直斥造馬及替李佳感到不值，紛紛湧到TVB及「See Saw先」社交平台專頁留言鬧爆TVB，又指節目快歌環節分數欠缺透明度。

無綫總經理曾志偉日前出席活動時就回應造馬之疑雲，表示自己都無諗過周吉佩攞獎：「邊有機會造馬，幾難，要其餘5個參賽者唱得唔好」，仲話如果要造馬都會造年紀大嘅参賽者，咁先可以證明係「中年好聲音」，強調分數有會計師核數。《中年好聲音》搞作多多，即將喺5月13日至14日於九展舉行演唱會。曾志偉亦於活動中表示，將會見到全部參賽者都成才，TVB已與入圍100強嘅參賽者簽約，現時多人搵嘅反而唔係周吉佩，而係吳大強及龍婷，笑指已為吳大強接咗一個廣告，仲勁過其兒子吳偉豪。曾志偉又透露，第二季《中年好聲音》已開始報名，現時反應熱烈，預料9月就會開拍，仲話歡迎第一季參賽者及TVB藝員參加。