日前香港經歷百年一遇嘅大暴雨，導致多區發生嚴重水浸，「黑雨」維持長達逾16小時，尋日下午（8日）3時40分先除下，熱愛跑步嘅影帝周潤發（發哥），當解除「黑雨」之後已「身痕」落街跑步，仲好Nice咁畀網民集郵，發哥同平時一樣全黑造型上陣，黑色背心短褲加Legging，獨自喺街頭練跑，期間，網民嘅一對仔女好興奮咁跟住發哥跑，場面搞笑！而發哥就跑到一身汗、佢大晒燦爛笑容，精神唔錯，不過手臂瘦到有啲皺皮，令網民都好擔心，嗌佢要記得食番多啲嘢！

其實發哥今年7月跑步時出意外，雙手手掌多處被石頭𠝹損流血，仲因為側身落地，令左邊身第4條肋骨出現骨裂，所以無論笑或是咳甚至用力些呼吸，都會感到十分痛楚，醫生已千叮萬囑，要暫停跑步運動2個月，不過佢上個月已經唔聽醫生話，曳曳「偷跑」被斷正，真係要保重身體呀！