李克勤近期追睇世界盃，對於英格蘭8強不敵法國出局，身為鐵粉的他「哭波喪」指要如其歌曲《紅日》一樣「別流淚、心酸」，值得安慰的是可以與兒子捱夜睇波。

李克勤、彭于晏、劉俊謙與女友蔡思韵昨日到沙田馬場出席《浪琴香港國際賽事》，有份演唱的克勤由內地回港後近期追睇世界盃，身為英格蘭球迷的他昨日凌晨當然有捱夜捧場，笑言因輸波而唱《紅日》：「命運就算顛沛流離……別流淚、心酸，4年一次世界盃就係咁。」他指英格蘭輸波，對他而言世界盃已經完結，餘下賽事抱住平常心去觀賞，但今年睇波有另一種享受，就是與妻兒一齊捱眼瞓睇波，家庭樂相當爽：「大家都鍾意英格蘭，佢哋亦鍾意葡萄牙，點知兩隊都返屋企。」

劉俊謙唔會呷彭于晏醋

講到在內地工作長達8個月，兒子可有掛念他？他笑說：「佢哋話唔使咁趕住返嚟，最緊要出糧，同埋唔好管佢哋。」他透露近期貪人煙稀少去了馬爾代夫旅行，之後會留港度歲。

彭于晏日前提早來港準備，直言因近期沒有工作容易偷懶，故要積極做運動保持狀態。早前來過香港拍戲的他隨後已返回台灣休息，放假會盡情吃喝玩樂放鬆，亦趁有時間學做陶瓷和飼養寵物。問到是否為拍戲而準備？他表示如果將來有機會當然好，因發覺拍戲以外甚麼也不懂，故希望學多點東西，又趁好友崔始源赴台開騷敍舊，至於拍電影則要待明年才開工，希望將來有作品上映時有機會來港謝票，問到可會偷偷入戲院觀察觀眾反應？他笑說：「不會！怕觀眾反應不好。」

劉俊謙與蔡思韵以情侶檔亮相，兩人皆是彭于晏的粉絲，問到會否呷醋？劉俊謙笑說：「唔會！我認輸㗎！樂於做成全佢嘅男人，亦唔會比較，因為唔同檔次冇得比。」他提到聖誕假期要拍電影，希望能抽時間食飯，蔡思韵指有時間會親自下廚，劉俊謙即賣口乖大讚她的廚藝。