MIRROR早前宣布7月舉行首個紅館個唱，暫定10場。由於去年MIRROR喺九展STARHALL舉行6場演唱會一票難求，黃牛飛甚至炒至5位數，fans要求主辦單位以實名制杜絕炒風。

不過有好消息！MIRROR下午透過facebook專頁公布，個唱會加開2場專門俾MIRROR官方歌迷會會員(MIRO）觀賞；而且12場show經城市售票網公開發售嘅門票，將會以實名制形式發售。至於買飛方法、公開售票日期等，個post只係話「我哋努力準備緊，詳情將稍後公布」。

尋日Tyson Yoshi宣布8月嘅香港個唱會以實名制賣飛杜絕炒風，本來佢係香港第一個推行演唱會門票實名制嘅歌手，點知轉頭被MIRORR爬頭。唔少fans都十分欣賞主辦單位從善如流，亦有人擔心如果唔設限購令，要買飛同樣係高難度動作。