台妹梁凱晴（Nina）係無綫J2台旅遊節目長駐台灣主持，除咗樣子甜美之外，擁有1米7高、43吋長腿及34D豐滿上圍，深得網民喜愛，被封為「長腿旅遊女神」。日前佢為慶祝Facebook及IG粉絲數目達8萬，上載多張性感比堅尼泳衣靚相，向網民大派福利。
日前梁凱晴喺社交平台大派福利，分享多張喺沙灘拍攝嘅性感比堅尼泳衣照，Nina穿上純白色比堅尼露出小蠻腰，更曬出一雙白滑長腿相當吸睛，引起網民暴動式留言，除咗大讚佢靚及好身材之外，仲紛紛求正面相及希望佢出寫真。
現年25歲嘅梁凱晴來自台灣，爸爸係移居台灣嘅香港人，而媽媽就係台灣人。甚有語言天份嘅Nina，精通廣東話、普通話、英語及阿拉伯語（大學時主修）。另外，Nina喺大學時期係肚皮舞社社長，仲曾經喺台北世界大學運動會開幕禮中表演過肚皮舞，熱愛運動嘅佢仲鍾意瑜伽、跑步同潛水。Nina入行三年，已經主持過唔少旅遊及飲食節目，代表作品包括《背包女行》、《玩起來》、《小滋女孩》、《出走地圖》及《台灣原味道》等等。唔止幕前事業，佢亦開設個人影片頻道，積極發展其KOL事業。
